Ողջու՜յն,
Վերադարձել ենք՝ կիսվելու երկար սպասված նորություններով։ Այս համարում ամփոփել ենք այն ամենը, ինչ կատարվել է այս տարվա առաջին քառորդի ընթացքում և արժանի ենք համարում ներկայացնելու ձեր ուշադրությանը։ Մաղթում ենք հաճելի ընթերցում։
Համարը սկսենք նախորդ տարվա ամփոփումով։ 2024-ին միասին կարողացանք մի շարք նախագծեր իրագործել, ստեղծել հնարավարություններ Հայաստանի շատ աղջիկների ու կանանց համար՝ աջակցելով նրանց գաղափարների իրագործմանը:
Այս հղումով կարող եք կարդալ տարեկան ամփոփումը՝ հետադարձ հայացք նետելով մեր գործունեությանը:
Շարունակելով պատմել նախորդ տարվա մեր հրապարակումների մասին՝ առաջարկում ենք կարդալ 2024թ․ Գործընկերության գնահատումը, որի նպատակն է վերլուծել Հիմնադրամի և դրամաշնորհառու գործընկերների խմբերի միջև հաստատված գործընկերային հարաբերությունների ուժեղ և թույլ կողմերը:
Այն կարող եք կարդալ մեր կայքում՝ անցնելով այս հղումով։
Նաև ձեզ ենք ներկայացնում որոշ տվյալներ այն մասին, թե 2024 թվականին որոնք են եղել Կանանց հիմնադրամում դրամաշնորհների տրամադրման հիմնական միտումները։
Ի դեպ, 2024թ․ Կանանց հիմնադրամի ֆինանսավորմամբ իրականացվել է 96 ծրագիր՝ ուղղված Հայաստանում ֆեմինիստական շարժման զարգացմանը, կանանց և աղջիկների զորեղացմանը մեր երկրի տարբեր մարզերում՝ փոքր գյուղերից մինչև խոշոր քաղաքներ։
Այսպիսով, հավատարիմ մնալով թափանցիկ և հաշվետու լինելու մեր սկզբունքին՝ վերլուծել ենք 2024-ին Հիմնադրամի կողմից ֆինանսավորված բոլոր ծրագրերը և փորձել հասկանալ՝ ինչքանով ենք կատարել մեր առջև դրած խնդիրներն ու մարտահրավերները:
Կարդացե’ք նախորդ տարվա ծրագրային ֆինանսական վերլուծությունը մեր կայքում՝ անցնելով այս հղումով։
Վերջապես ձեզ ենք ներկայացնում «Ֆեմինիստական շարժումը Հայաստանում բազմակողմանի ճգնաժամերի և նվաճումների միջև» հետազոտության արդյունքները, որն իրականացվել է Հայաստանում կանանց հիմնադրամի կողմից 2022-2023 թվականներին՝ հետպատերազմական և ընթացիկ ճգնաժամերի շրջանում, և ամփոփում է իրականացված 33 հարցազրույց՝ Հայաստանում կանանց/ֆեմինիստական շարժման ներկայիս իրավիճակը հասկանալու համար։
Հետազոտությունը հասանելի է մեր կայքում՝ այս հղումով։
Գիտենք՝ երկար եք սպասել այս նորությանը✨
Ուրախ ենք հայտնել, որ Հայաստանի ժամանակակից աշխատավորուհու նոր համարն արդեն պատրաստ է: Այն արդյունքն է մեր ու մեր գործընկերուհիների ամիսների աշխատանքի՝ նվիրված մեր իրականության մեջ կանանց ու համակարգայնորեն անտեսված խմբերի խնդիրների քննարկմանը: Համարը ներառում է բազմազան պատմություններ, զրույցներ, քննադատություններ ամենատարբեր կանանց կողմից ու նրանց մասին:
Թերթի անվճար օրինակը կարող եք վերցնել մեր գրասենյակից՝ նախապես գրելով մեր սոցիալական էջերին։
Այս հոդվածում ձեզ ենք ներկայացնում, թե ինչպես կարելի է ավելի մեծ արդյունքների ու ազդեցության հասնել հենց հիմնադրամներին անգամ ամենաչնչին նվիրատվություններ անելով։ «Ֆիլանթրոպիայի կամ ֆիլանթրոպիկ հարաբերությունների մեջ ամեն մարդ կարող է լինել կյանքում առնվազն մեկ անգամ՝ դրա ամենատարբեր կողմերից»։ Ճիշտ պահը հիմա է։ Կարդացեք հոդվածը և եթե որոշեք նվիրատվություն անել, կայքում կկարողանաք հեշտությամբ գտնել համապատասխան բաժինը և ձեր ներդրումն ունենալ մեր գործունեության մեջ։
Հիմա անցնենք մեր գործունեության առանցքային ուղղություններից մեկին՝ դրամաշնորհներին։ Այս տարի արդեն հայտարարել ենք 3 մրցույթ, որոնց մանրամասները՝ ստորև․
Ֆեմինիստական միջոցառումների բաց կանչ
Արդեն իսկ մեր կայքում հասանելի է տարվա ֆեմինիստական միջոցառումների երեք ուղղություններով դրամաշնորհների հայտարարությունները՝
- «Կանանց իրավունքների օր՝ ամեն օր․ մարտի 8-ի միջոցառումներ»,
- «Ֆեմինիստական միջոցառումներ՝ նվիրված Ընտանեկան բռնության դեմ պայքարի ազգային օրվան (Հոկտեմբերի 1)»,
- «Ֆեմինիստական միջոցառումներ՝ նվիրված Գենդերային բռնության դեմ պայքարի 16-օրյա ակտիվիզմին (նոյեմբերի 25 – դեկտեմբերի 10)»:
Կից հղումով կարող եք ծանոթանալ յուրաքանչյուրի մանրամասներին և արդեն մտածել դեռևս առկա դրամաշնորհներին դիմելու մասին։
Իսկ այս հոդվածում ձեզ ենք ներկայացնում «Կանանց իրավունքների օր՝ ամեն օր․ մարտի 8-ի միջոցառումներ» դրամաշնորհի արդյունքում ընտրված բազմազան ծրագրերը՝ հացի ցուցադրությունից մինչև ֆուտբոլի կազմակերպում, դրեգ միջոցառում, երաժշտական փառատոն և այլն: Ի դեպ, անցկացված միջոցառումների աշխարհագրությունն էլ նույքան բազմազան է և ընդգրկում է ինչպես մայրաքաղաք Երևանը, այնպես էլ մարզերը։
Մարտի վերջին հայտարարեցինք ևս մեկ նոր դրամաշնորհային ուղղության մասին, որը ոչ միայն ֆինանսական աջակցություն է ենթադրում, այլ շատ ավելին՝ կարողունակությունների զարգացում, որը միտված է լինելու կլիմայի և գենդերային արդարության շարժումների ամրապնդմանը Հայաստանում։ Կարողությունների զարգացման թեմատիկ դասընթացները մեկնարկելու են մայիս ամսվանից, իսկ դրանց հաջորդելու է դրամաշնորհի հայտարարությունը: Մեր հաջորդ համար կներակայացնենք արդյունքների մասին:
Վերջերս ջերմ հանդիպում ունեցանք դեռահաս աղջիկների խմբի մեր նոր գործընկերուհիների հետ: Հանդիպման ընթացքում մասնակիցները ծանոթացան միմյանց հետ, ներկայացրին իրենց նախաձեռնությունները, կիսվեցին իրենց փորձով և ծրագրերի իրականացման ընթացքում իրենց ձեռք բերած գիտելիքներով և նոր հմտություններով, ֆեմինիստական ֆիլանթրոպիայի մասին իրենց մտքերով և առաջարկներով: Ծրագրերի ներկայացման համատեքստում ծավալվեցին քննարկումներ այն խնդիրների վերաբերյալ, որոնց բախվում են դեռահաս աղջիկները Հայաստանում՝ բուլինգից մինչև սննդային վարքի խանգարումներ և գենդերային խտրականություն և շատ ավելին։
Այս ամիս ՀԿՀ համահիմադիրներն ուսումնական այցով Դանիայի մայրաքաղաք Կոպենհագենում էին: Այնտեղ մեզ հյուրընկալել էր դանիական Կվինֆո ընկերությունը, որը գենդերային հավասարության ուղղությամբ աշխատող կենտրոն է: Այցի ընթացքում ծանոթացանք գենդերային հավասարության և ֆեմինիստական գործունեության սկանդինավյան փորձառությանը:
Իսկ այս օրերին ՀԿՀ համահիմնադիր Գոհար Շահնազարյանը գտնվում է Կոլումբիայի մայրաքաղաք Բոգոտայում՝ մասնակցելու EDGE համաժողովին: Այս տարվա համաժողովը կենտրոնանում է արդարության համար պայքարող շարժումների առաջնորդների առջև ֆինանսավորողների հաշվետվողականության վրա, ինչպես նաև համակարգային փոփոխությունների նկատմամբ դոնորների իրական հանձնառության վրա:
Եվ վերջում՝ տարվա նորությունը 🎉
Ուրախ ենք հայտարարել նոր նախաձեռնության՝ Ֆեմինիստական ակադեմիայի մեկնարկի մասին։
Ֆեմինիստական ակադեմիան կառաջարկի թեմատիկ դասընթացներ ուսանողների, հետազոտողների, գիտնականների, քաղաքացիական հասարակության առաջնորդների, միջազգային կազմակերպությունների և գենդերային ու կանանց ուսումնասիրություններով հետաքրքրված քաղաքականություն մշակողների համար:
