Ուրախ ենք տեղեկացնել, որ արդեն հայտնի են Երիտասարդ կանանց ստեղծարար գաղափարների դրամաշնորհի մրցույթի արդյունքները: Ստացել էինք 23 հայտ Հայաստանի տարբեր մարզերից: Ընտրվել են հետևյալ 5-ը.
- «Տեքստ հարթակ» մշակութային- կրթատեղեկատվական հկ – Կնոջ մարմնի (ան)հասանելիությունը. հեքիաթից մինչև նորաձևություն: Ծրագրի շրջանակներում նախատեսվում է կազմակերպել երեք բաց դասախոսություն-քննարկում, որտեղ կքննարկվեն կնոջ մարմնի ու սեռականության, սեքսի և սեռական բռնության ընկալման մեկնությունները: Նաև նախատեսվում է նկարահանել երեք տեսագրություն, որոնք կխոսեն առաջին հայացքից խնդրահարույց թեմաների շուրջ:
- Հերմինե Անդրիկյան – sevanVELOtime նախաձեռնություն – Սևանի տարածաշրջանի կանանց ու աղջիկների համար հեծանվի մարզումների ու արշավների կազմակերպում: Մարզերում շատ կանանց և աղջիկների երազանքն է եղել հեծանիվ վարել սովորել, սակայն շատ կարծրատիպերի և բարդույթների պատճառով այն մնացել է մանկության անիրականանալի երազանք։ Նախաձեռնությունը խրախուսում է հեծանիվ վարելը և հրավիրում բոլոր կանանց, առանց տարիքային սահմանափակման, հեծանիվ վարել սովորելու՝ դրանով իսկ կոտրելով կարծրատիպեր:
- Հռիփսիմե Ղազանչյան – Էություն, Essence, Сущность խեցեգործական քանդակների շարք: Նախագծի նպատակն է կավե գանգերի միջոցով ցույց տալ հաճախ թիրախավորվող կանանց խնդիրները: Այն ուղղված է ի ցույց դնելու սեռական, ռասայական և կրոնական խտրականությունները՝ հատկապես կանանց ստորադասումը, նրանց անհատականության արհամարհումը, պիտակավորումը, ինչպես նաև տարբերակումն ու գնահատումը:
- Սպիտակի Հելսինկյան խումբ հկ – Ֆեմինիզմն արվեստի լեզվով: Ծրագրի նպատակն է արվեստի միջոցով օգնել դեռահաս աղջիկների ինքնաճանաչմանը, հուզական ֆոնի կարգավորմանը, ինչպես նաև ինքնաճանաչման միջոցով կայունացնել և հաղթահարել հոգեկան անկայուն վիճակը և վախերը։
- Հասմիկ Սիմոնյան – Կին, որ չի լռելու. խոսել փորձառության մասին գրականության լեզվով: Առաջին անգամ հայերեն թարգմանությամբ կներկայացվեն ֆեմինիստական արտասահմանյան ժամանակակից ներկայացուցիչների հոդվածներն ու գրական ստեղծագործությունները՝ 5 բանաստեղծական շարք, 5 պատմվածք, թարգմանական էսսեներ ու հոդված, հանրությանն անհայտ 4 հայ կին հեղինակների ստեղծագործությունների հատվածական ներկայացում: Նախատեսվում է նյութերի հավաքագրում, շարվածք, խմբագրում և սրբագրում, ապա հանրայնացում առցանց պարբերականում և սոցհարթակներում:
Շնորհավորում ենք հաղթող նախագծերի հեղինակներին և մաղթում արդյունավետ համագործակցություն: Դրամաշնորհի ծրագիրն իրականացվում է Նորվեգիայի հելսինկյան կոմիտեի ֆինանսական աջակցությամբ:
