2025թ․ գերմանական ֆիլիա հիմնադրամի աջակցությամբ Հայաստանում կանանց հիմնադրամը ինստիտուցիոնալ և դիմադրողականության ամրապնդման դրամաշնորհներ է տրամադրել ֆեմինիստական նախաձեռնություններին, կանանց կողմից ղեկավարվող խմբերին և ակտիվիստներին ամբողջ Հայաստանում։
«Կանանց արվեստի շրջանակներ» – Այս նախագծի միջոցով Մարիամ Ալեքսանյանը և Բէլա Պողոսյանը Վանաձորում կազմակերպեցին կանանց մի շարք շրջանակներ, որոնք կենտրոնացած էին ինքնաճանաչման, հուզական բարեկեցության և սոցիալական գիտակցության վրա։ Նախագիծը միավորեց տարբեր տարիքի կանանց և աղջիկների ութ հանդիպումների և Դսեղում կազմակերպված հանգստյան օրերի միջոցով՝ ստեղծելով աջակցող տարածք մտորումների, ուսուցման և կոլեկտիվ խնամքի համար։
Մշակութային և սոցիալական նարատիվների լաբորատորիա (CSN Lab) – «Բարդ անցյալի դպրոց։ Շրջակա միջավայր. կանանց ծրագիր» նախագծի շրջանակներում CSN Lab-ը իրականացրեց ֆեմինիստական և շրջակա միջավայրի այլընտրանքային կրթական ծրագիր Երևանում։ Երեքօրյա ինտենսիվ դպրոցը միավորեց ավելի քան 30 մասնակիցների՝ դասախոսությունների, սեմինարների և կոլեկտիվ ուսուցման միջոցով ուսումնասիրելու էկոֆեմինիզմը, շրջակա միջավայրի արդարադատությունը, կլիմայական ակտիվիզմը և կանանց ներդրումը շրջակա միջավայրի շարժումներում։
Կանանց սոլիդարության կենտրոն – «Տեղը խոհանոցն է» նախագծի շրջանակներում կենտրոնը կազմակերպել է համայնքային հանդիպումների շարք Լոռու մարզի Դսեղում, Մարգահովիտում և հարակից համայնքներում: Նախաձեռնությունը ստեղծել է անվտանգ տարածքներ կանանց համար՝ քննարկելու գենդերային դերերը, բռնության կանխարգելումը, հուզական բարեկեցությունը և ինքնաճանաչումը սեմինարների, քննարկումների, ֆորում թատրոնի և մասնագետների հետ հանդիպումների միջոցով՝ միաժամանակ ամրապնդելով տեղական կանանց ցանցերը և համերաշխությունը:
Jazve Talks փոդքասթ – «Ֆեմինիստական նախաձեռնությունների դիմադրողականության ամրապնդում» նախագծի շրջանակներում Jazve Talks-ը պատրաստել է փոդքասթի մի շարք դրվագներ, որոնք անդրադառնում են գենդերային բռնությանը, ինքնապաշտպանությանը, առցանց ոտնձգություններին և արհեստական բանականության հետ կապված մարտահրավերներին կին արտիստների համար: Նախագիծը հզորացրել է փոդքասթի արտադրական կարողությունները, ընդլայնել լսարանը և ուժեղացրել է Հայաստանում ֆեմինիստ ակտիվիստների, մասնագետների և արվեստագետների ձայները:
Կանանց ռեսուրսների կենտրոն – Իր թիմի և ցանցի անդամների համար բարեկեցության և կարողությունների հզորացման ծրագրի միջոցով Կանանց ռեսուրսների կենտրոնն իրականացրել է ֆեմինիստական տեսության դասընթացներ, աշխատանքային իրավունքների և ԱՄԿ 190 կոնվենցիայի վերաբերյալ պաշտպանության քննարկումներ, բարեկեցության հանգստյան օրեր և խնամքին ուղղված գործունեություն: Նախաձեռնությունը աջակցել է մասնակիցների մտավոր և ֆիզիկական բարեկեցությանը, ամրապնդել նրանց գիտելիքները գենդերային արդարության, ֆեմինիզմի և աշխատանքային իրավունքների վերաբերյալ, ինչպես նաև խթանել է կոլեկտիվ խնամքի, դիմադրողականության և փոխադարձ աջակցության մշակույթը ակտիվիստների, կամավորների և համայնքի անդամների շրջանում:
