Փետրվարի վերջին Հայաստանում կանանց հիմնադրամը նոր դրամաշնորհային հնարավորության մասին հայտարարություն էր տեղադրել, որը վերաբերում էր այն բոլոր հետաքրքիր միջոցառումներին ու նախաձեռնություններին, որոնք կանանց տարբեր խմբերը ցանկություն ունեին իրականացնելու մարտի 8-ի իրական նշանակության ու խորագրի ներքո։
Երկու շաբաթվա ընթացքում ստացանք 51 բազմաբովանդակ գաղափարների իրականացման հայտեր։ Յուրաքանչյուրն առանձնանում էր իր ուրույն ուղղվածությամբ և մտահղացմամբ։ Ցավոք, հնարավորություն չունեցանք աջակցելու բոլոր հայտերին կամ դրանց մեծ մասին, որոնք իրապես հետաքրքիր էին և ոգեկոչում էին մարտի 8-ի ֆեմինիստական արմատները։
Ստորև նրկայացնում ենք ընտրված 5 նախաձեռնությունները, որոնք տեղի են ունենում կամ կունենան մարտի 8-ին կամ մարտ ամսվա ընթացքում։
Արմինե Զաքարյան և Բու Այլ տուն
Միջոցառման ընթացքում նախատեսվում է հանդիպում հրավիրված խոսնակների հետ, ովքեր կպատմեն մարտի 8-ի և ֆեմինիստական շարժման ծագման պատմությունները, կխոսեն շարժման անցած ճանապարհի և ներկայիս զարգացման միտումների մասին, կներկայացնեն առողջ ապրելակերպի, սպորտի ու ինքնախնամքի դերի և ֆեմինիզմի փոխառնչությունը, ինչպես նաև կկազմակերպվի կանանց հեծանվային քաղաքային երթ` «Վերանվաճելով հանրային տարածքները» կարգախոսի ներքո։ Միջոցառումը տեղի կունենա Վանաձորում՝ Բու լեռնահեծանվային սրճարանում։
Գոհար Խաչատրյան և Նոր Լույս ՀԿ
Գաղափարի հիմքում ընկած է հետևյալը․ չորսօրյա Empowerment Self-Defense (ESD) ինքնապաշտպանության դասընթաց անցակացնել «Նոր Լույս» ՀԿ-ի մենթորինգ ծրագրում ներգրավված սոցիալապես անապահով 15 դեռահաս աղջիկների համար: Դասընթացի նպատակն է մասնակիցներին տրամադրել հմտություններ, գիտելիքներ և վստահություն, որը կօգնի նրանց կանխել և արդյունավետ կերպով արձագանքել անցանկալի իրավիճակներին՝ բանավոր ոտնձգություններից մինչև ֆիզիկական բռնություն, ինչպես նաև հաստատել իրենց անձնական սահմանները և որոշումներ կայացնել, որոնք բխում են իրենց լավագույն շահերից: Դասընթացը կկայանա Գյումրիում՝ Նոր Լույս ՀԿ տարածքում։
Տրանս անձանց իրավունքների պաշտպանության գլոբալ հիմնադրամ
Քանի որ մարտի 8-ը կանանց միջազգային օրն է, Տրանս անձանց իրավունքների պաշտպանության գլոբալ հիմնադրամը ցանկանում է անցկացնել միջոցառում՝ հրավիրելով տրանս անձանց, սեքս աշխատող կանանց, ակտիվիստների, տարբեր հասարակական կազմակերպությունների ներկայացուցիչների, դեսպանության աշխատակիցների և դեսպանների՝ այդ օրը խոսելու կանանց իրավունքների մասին «Տրանս կանանց իրավունքները նույնպես իրավունքներ են» խորագրի ներքո։
Սոսե կանանց հիմնահարցեր ՀԿ
Սոսե կանանց հիմնահարցեր ՀԿ-ը գաղափարն իրականացնելիս նպատակ ունի հրավիրելու թեյախմության Սյունիքի մարզում հաջողության հասած, ինչպես նաև կազմակերպության շահառու և արցախցի կանանց։ Կարևոր է ստեղծել ազատ տարածք երկու կողմերի միջև՝ ազատ և անկաշկանդ քննարկելու կանանց դերը ամենահին ժամանակներից առ այսօր, խոսելու գենդերային հավասարության, գենդերային դերերի և դրանցից բխող կարծրատիպերի մասին։ Ամենակարևորը՝ շեշտել Մարտի 8-ի դերի և կարևորության մասին։ Հանդիպման տևողությունը՝ մոտ 3-4 ժամ։ Հանդիպմանը կհրավիրվեն մասնակիցներ ամբողջ Սյունիքի մարզից։ Հանդիպումը տեղի կունենա Գորիսում։
«Աղջիկները խոսում են» նախաձեռնություն
Նախաձեռնության անդամները պլանավորում են իրականացնել գաղափարը մարտի 1-ից մինչև մարտի 8-ն ընկած ժամանակահատվածում: Այն իրենից ենթադրում է «գովազդային» պոստերների պատրաստում, որոնք կփակցվեն Երևան քաղաքի տարբեր հատվածներում: Պոստերները արտաքինից կառաջարկեն նախատոնական զեղչեր և ակցիաներ ծաղիկների, կոսմետիկայի, խնջույքների համար, որոնց վրա փակցված QR-ները սկան անելուց հետո մարդկանց առաջ կբացվեն պոստերներ, որոնք ցույց են տալիս, թե կանայք ինչ խնդիրների միջով են անցնում Հայաստանում՝ չվճարվող աշխատանք, ընտանեկան բռնություն, առօրյա խտրականություն: QR-ները կտեղակայվեն նոր ստեղծված Girlstalk կայքում, որը հետագայում կծառայի որպես հարթակ նախաձեռնության համար: Նախաձեռնության շրջանակներում նաև կիրականացվեն հանդիպումներ Վանաձորում և Գյումրիում՝ ՓԻՆՔ իրավապաշտպան ՀԿ մարզային տարածքների հետ, ինչպես նաև մարտի 6-ին կկազմակերվի ցուցահանդես, որի անվանումն է «Տեսանելի անուն»:
Հետևեք գործընկերուհիների և մեր սոցիալական մեդիա էջերին՝ միջոցառումների մասին ավելի շատ մանրամասներ ունենալու համար։
